WILLEMSTAD- Koleganan di ASKA Insurances a uni i huntu a aportá dunando bek na komunidat di Kòrsou. Manera ya ta konosí Curadoet anualmente ta duna oportunidat na míles di boluntario pa aportá riba 2 dia na diferente proyekto. ASKA Insurances ta kere ku nos siudadanonan mester ta konsiente awor mas ku nunka ku nos tera por produsí hopi i p’esei a skohe pa duna un man na Hòfi Moringa. Riba e dia aki koleganan a bini huntu i pa kuminsá e mainta nan a haña un rekorido den e Hòfi ku ta keda manehá pa Sra Marchena. Durante di e rekorido aki a mustra kon e hòfi ta funshoná i kiko ta keda produsí den e hòfi, serando empleadonan konosí di e forma aki ku diferente yerba i mas ku tur kos e mata di Moringa. Mas despues koleganan a siña kon pa planta na e forma korekto i tambe a yuda plantando diferente mata i hasi limpiesa den e hòfi, pa asina den futuro por sigui produsí. ASKA Insurances di e forma aki ke enkurashá pueblo di Kòrsou pa konosé e posibilidatnan ku nos tera mes ta duna.